واوات عبد القوى ” رباعيات من فن الواو”
شعر : محمد عبد القوى حسن
واوات عبد القوى
انا كنت فارس زمـــــانى
بس الليالى طوتنــــــــى
خلتنى طول ليلى اعانى
ف الصبح ولقيتنى متنى
***
خضنا السنين الخطيرة
ولا مرة منها اشستكينا
جاتنا السنين الهزيلـــة
هزمتنا بكت عنينـــــا
***
فرسان ولا سيف ف ايدنا
ولامهرة طلت علينـــــــا
نشفان ولا اتبل ريقنــــــا
متشققة بحور وادينـــــــا
***
جاتنا السنين الخوالـــــى
من غير مانعمل حسابنا
ورخصنا عند الغوالــى
والكل فارق وسابنــــــا
***
وقعدنا من جنب حيطنا
لاحول لينا لاقـــــــــــوة
نخلط همومنا ف عروقنا
من هوة ندخل لهـــــــوة
***
وابن اللى وطت ومــالت
واخد زمامة وفـــــــــارد
وبرغم ريحتة اللى فاحت
حاكم وقابض وشـــــــادد
***
واندسوا فى الحلبة خصيان
عاملين علينا فــــــــوارس
فى الجد طلعوا جديــــــان
واحنا اللى شلنا الكوارس
***
وابن الهميلة السفيــــــــة
قاعد على التل بـــــــارد
ف الشدة مانلتقيـــــــــــة
ف الخزى والعهر مارد
***
كانت وكنـــا وكانــــــــــوا
قلعة وشوارع بيــــــــــوت
رحلوا اللى تعبوا وعـــانوا
جونا اللى مسكوا الريموت
***
ولاعدش زمن العنــــاتر
ولا عدش زمن الأصول
اللى بناها ماغــــــــادر
جوم سكنوا فيها الفلول
***
اقرأ/ى أيضا :نشرة الأخبار الفنية والثقافية لصحيفة الساعة 25
عذراً التعليقات مغلقة