طيِّب.. كفاية بَقَه . قصيدة بالعامية المصرية
القلب منِك تعب
نوبة ورا نوبة
و ف كل مرَّة يتوه
و تجيله 100 نوبة
يا ريتني أقدر أقول
يكفي مابينا وصال
قلبي جفاه القول
أخرس ، وكان قَوَّال
عايش على الترحال
و ماتنفعه توبة
راح م الشَّقى للشَّقى
طيب .. كفاية بقه
عاش من زمن ع الأمل
و بناه قصور وقصور
ع البحر أو في الجبل
هايم في ضَىْ بدور
تنزل دموعه مطر
دمعه ينُوح ويقول
: مش باينة بين البشر
فينك يابنت الحُور ؟
نطق الجماد و الحَجَر
و الصبر مني انتحر
و انا روحي متشعْلَقة
طيِّب …كفاية بقه
الشكوى متكتفة
و النبض متقيِّد
وصبحت عبد الوفا
و كنت متسيِّد
مين اللي قال اننا
نشبه قلوب بعضنا ؟
قلبي يدوب لو غَفَا
قلبه يغيب بالسنة
سارق عيون اللقا
و جاي يلومني أنا
ظالم قتلني و بَكَى
و راح سَبَق واشتكى
و نصب لى 100 مشنقة
طيب … كفاية بقه
أنا رحت أقول شكوتي
للقاضي رجعَنِي
عطف على بلوتي
و العطف مانفعني
لما سمع كلمتي
قال لي و سمَّعني
: زيَّك أنا في الهوى
و البلْوَى تجمعنا
و لو لقيت الدوا
.. أمانه ترجع لي
أنا قلت: يلا سوا
نشكي لقاضي السمَا
بعد الفراق و الشَّقى
يحكم لنا باللُّقا طيب …
كفاية بقه
الشاعرة فى سطور
عذراً التعليقات مغلقة