شعر : معوض حلمى _ مصر
كنت سارح بين غيطان الأمنيات
كنت طاير ، زي العصافير ع الشجر
فجأة حسيت بالسكات
كنت باحلم بنور الفجر
يطلع شقشقه
والليل معاند رافض طلوع الشمس
سرسب الإحساس شقى
واتخطف ضي العيون
كل الوشوش رغم إختلاف اللون
باشوفها باهته معتمه
ساعة الوجع كل الملامح قاتمه
حتى الفرح بقى ضيف عزيز
والجلد كرمش من مرار الإنتظار
والدم فار م الاورده بلغ فرار
مالناش نصيب في الإختيار
والقلب مش عارف يعيش
رمينا زهر الآمنيات طالبين جوهار
وجالنا شيش
وإزاي أعيش وأمد ريش
والريح معانداني
وبذرة الأحزان عفيه
ونبتها شيطاني
ومين اللي وداني لشلة المحاسيب
وانا الغريب اللي خوفي غطاني
ضاق المدى والدمع أصبح مستباح
عايزين نطير
وإزاي نطير من غير جناح
حتى الصباح اترسم وهم وخداع
طب مين اللي باع ..؟
وإزاي يساع الكون قلب اترعش م الخوف
صوت الدفوف اتوشم في وداننا موت
فتح التابوت ، مستني آخر نبض
والجته رافضه الإنهزام
رافضه طلوع الروح
طلعت تدور ع اللي باقي
ف مخلة الدراويش
ملقتش غير تناتيش وجع
وحبة امل للبيع
فرت الكراريس يمكن وقع
بين السطور لبن الرضيع
مات الربيع
خضار الروح قلب لبوار
دار ع المدار الساقي
صوت السواقي لم البواقي نفير
والأرض شقت م الشراقي
نشفت دموع البير
والأرض شقت م الشراقي
نشفت دموع البير
