ما فضلش واحد
م اللي كانوا بيلعبوا وياك
صندوق براءة …
و اتقفل ع السر
تفضل مكانك …
في محلك سر
كبروا وسابوك
لمّتهم الدنيا ف شنط لبعيد
ووقفت وحدك زي عيل تاه
مين وسط زحمة
يحضنه ويلقاه
بقيت خشب كل الوشوش
وشاكوش قساوة دق مسمار السكوت
لازم تموت
فضيت بيوت القلب م السكان
والوحدة جوة عنيك
اتفجّرت بركان
كل اللي عدى من هنا
ماسح على عتبة عيونك .. كان
كل الطرق مرصوفة بالنسيان
كانت ودانهم دفا
على صوتك البردان
طين البراءة نشف
أصبح حجر صوان
اخبط دماغ كل الحكاوي ف حيط
لساك بتلعب هنا
لساك بقلب عبيط
لا قدرت تكبر زيهم وتروح
ولا حد منهم
ساب الطريق مفتوح
وحدك هنا
والتوهة من حواليك
أوتاد سراب مدقوقة جوا عنيك
وحده العطش …
في القلب صورة وصوت
من امتى واقف تنتظر
من فوق رصيف عيل
من امتى قطر حياة
كان من هنا بيفوت
***
شعر : أبو زيد بيومى _ مصر
