يا ريت كل الزمن رمضان
وعاد رمضان كما عودنا
بنشوفه وبنحسُّه وبنعيشه
بروحه الطيبه اللولي
ملامح ضيَّها يرسم جميل الوش
يطل علينا بهلاله
وفرحه بَشُوشه بتغني
ف عيون الناس
( رمضان جانا وفرحنابه مرحب رمضان )
وعيال بتسرح في قلوبنا
وقايد فرحها فوانيس
ويعلا صوتها ويلالي
( حلو يا حلو رمضان كريم يا حلو )
ويحلا في السحور الفول أبو طحينه
وبيضه صابحه مسلوقه
وحتة جبنه وخياره
وذبدايه ما شاء الله
نجوم ماشيه في عين الدنيا للجامع
تصلي الفجر يجمعها إيمان خالص
ودمعة توبه ندمانه
تقوم النفس من نومها
وتركع للكريم .. تسجد
وتحمد للإله نعمُه
شوارع تتفرش بهجه
موائد وهبه للرحمن
فطور وسحور في كل مكان
وكان يا ما كان فؤاد حداد ومكاوي
ما زال في الذكرى والخاطر
( إصحى يا نايم إصحى وحِّد الدايم إصحى وحِّد الرزَّاق رمضان كريم )
يدوب فينا الحنين بنحِّن ..
لكلمه طيبه صادقه
وصدقه تمحي ذنب عظيم
نفوس الناس صباح قشطه وقمر ونَّاس
يا ريت كل الزمن رمضان
ياريت كل الزمن رمضان
شعر : نبيل مصيلحي ـ مصر
قد يعجبك أيضا:
كفايه الحزن يا جدَّه ..!! قصيدة بالعامية المصرية
عذراً التعليقات مغلقة