المحتويات
شعر: محمد عبد القوى حسن
فى مولد حبيبنا النبى الرسول
بنسعى ونسعى لنيل القبول
نصلى نسلم على نور جمالة
ونكتب كتابنا
ف بدر اكتمالة
نطوف البلاد البلاد البلاد
ونرجع نسلم نصلى بوداد
ونور اليمام اللى حلق وزاد
وورد النسيم اللى شرق وفاض
وزهر الروابى
ف عز اغترابى
فى صحراء بعيدة
فى خضرة وادينا
فى سندس ومينا
وبحر المحبة اللى زايد علينا
يانور العيون
وكحل الجفون
وقلبك حنون
ياطة المكمل
واحمد محمد
وصابر وداير فى عز الرطوبة
وف قلب طوبة
لاهامك رياح العتية اللى قاسية
ماواخد ف بالك جحافل وراسية
هزمت اللى فاكرة وهزمت اللى ناسية
وقدت السفينة على احلى مينا
ودّبت فى جسد الحياة السكينة
وهّبت فى عصب الامانى الامينة
ورّغبت ف عشقك مواكب متينة
هاجرت بدينك
ونوّر اللهى بنورة سنينك
وزادت على الدرب بشرى حنينك
وانصار بتنصر
وانهار بتهدر
واحبار بتبدر
حروفك رصينة
ياشطين ومرسى
ومينا بترسى
وشافع ودافع وللمولى رافع
بتطلب شفاعة لاهلك وناسك
لامة محمد حبيبى المتيم
انا من جداول رياحين عبيرك
ومن نهر روح الامانى اجيلك
على الحوض ياغالى
احقق امالى
واشرب واتوضى واسبح بروحى
واحضن هواك
واشرب رضاك
واغسل سنينى وهمى ونوحى
واطلق حمامى وهيامى وغرامى
ف عز انسجامى يمامى ف بوحى
اصلى لسماحة جلالة قليبك
واغنى ف حضرة صفائك وطيبك
تاخدنى الجلالة لاجمل قوالة
وننشد نشيد النبى الامين
ونرقى عيالنا بطول السنين
ونكسى بدنا بصلاتك
ونملى بطونا بذكاتك
ونشطف عيونا بصفاتك
كرامات وبدر
سلامات ونذر
تحيات صلاة
لنور الحياة
وعطر الاباة
وشهد الرعاة
وفهد السماء
وورد السخاء
ومجد العطاء
ووجد الوفاء
انا من امانى الامانى بقلبك
وحبك حبيبى المحبب لربك
وسيرتك فى حضرة هواها اصول
فضيلتك حبيبى واجمل رسول
امانة يارايح بلاد الحبيب
تسلم على القلب قلبى يطيب
وروحى فى هواة
وضلى فى رضاة
وعشقى ف مناة
وصدقى ف صلاة
وروحى تعلق روحى ف سماة
اصلى واسلم ياخير الوراء
واقبل جبينك
ف صفوة حنينك
واملى عيونى من شهد عينك
واغسل جفونى من ورد تينك
واسبح واهيم بسر الكريم
واصبح من الفجر قلبى سليم
اذا ما توضى وصلى وارضى
على القلب طيفك هفهف وندى
تخضر سنابل عمرنا بقمرنا
وتطرح نسايم املنا برسولنا
نحقق جميعا جميعا ميولنا
ونطلع فى موكب نسايم طويل
بطول نهر دجلة وطول نهر نيل
نهنى الحبايب بعيد البشير
صلاة سلاما وعطرا عبير
ووردا جليا عفيا جميل
ودمعى اللى سايل كانهار يسيل
وحبى اللى طايل شواشى النخيل
جناحات تحلق فى قلب تعلق
وبرق البراق الشموس اللى تشرق
وشهد انشقاق الشعاع اللى يبرق
ومهد الوفاق اللى داق سلسبيل
وعهد الرفاق الرقاق الاصيل
جميعا جميعا بنجرى اليك
وديعا وديعا نقبل ايديك
حبيبى ياطة محمد واحمد
يامحمود ياقاسم على وجوهنا راسم
بشرى بصلاتنا وسلامنا عليك
