انها صورة لامرأة فقيرة بسيطة معدمة من محافظة دمياط بمصر لبائعة الخضروات التى تم القبض عليها وقاموا برمى الخضروات على الارض فريق الاشغالات الذى تعرض للسيدة يقال ان محافظ دمياط قد عاقبهم ووقع عليهم جزاءات وخصومات وايضا اتخذت

الدكتورة منال مخائيل محافظ دمياط تأمر بوقف رئيس حي رأس البر وتعويض سيدة الخضار ب ٧ ألاف جنيه وعربيتين ربع نقل محملة بالخضار

ونشرت الصحف اخبار متعددة عن السيدة التى اكدت ان زوجها ضرير وان الاموال التى اشترت بها الخضروات مستدانة وان ظروفهم الحياتية من اصعب مايكون ..

سنترك قضايا تضارب التصريحات والاراء حول السيدة ونستمع الى الشعراء فماذا كتبوا عنها .

المحتويات

الشاعر علاء عيسى

سعادة جناب الباشا الهمام
من النجع كله باعت لك سلام
بنشكر جنابك ياراعى النظام
يا حامى حمانا وجايب حقوقنا
من الحاجة فاطمة مرات عبسلام
…….
الهى يزيدك نباهة وذكاء
مسكت بشطارتك فى أس البلاء
ابويا وعمى وخالة مراتى
بنشكر سعادتك يا وش الرخاء
عشان انت مجدع حاربت الغلاء
الهى نجاملك قريبا وعاجل
فى زفة طهورك وفرح المدام
يا حامى حمانا وجايب حقوقنا
من الحاجة فاطمة مرات عبسلام
…….
بطاطا وبطاطس وغيرها كتير
وشكل الصبية مورد كبير
ماتشغلشى بالك سعادتك ودوس
تقولك يتامى وعيل صغير
بلاها الغلابة يغور الفقير
كفايا علينا نشمشم وراكم
مادمتم شبعتم هانبقى تمام
يا حامى حمانا وجايب حقوقنا
من الحاجة فاطمة مرات عبسلام
…….
الهى يراضيكوا بمخالفة نقاب
وتطلع فى سهرة فى عشوة كباب
واهو كله ماشى وباسم القانون
موظف بيسرق ومالى الدولاب
وغيره ما يقدر يجيب الشراب
يارب انت عالم طموح الغلابة
مجرد معيشة نعيشها ف سلام
يا حامى حمانا وجايب حقوقنا
من الحاجة فاطمة مرات عبسلام

علاء عيسى

—————————————-

الشاعر : السيد عبد الفتاح

قدمت ليكي السبت وال حد ..
وآخر الإسبوع
وعزمت عمري اللي باقي ..
اني اعملك موضوع
بصيت لقيتك ميتة في الأصل
كتبالي فوق تربتك ..
إن العزا ممنوع
طعنت بالتزوير ..
وقلت مش خطها
إحنا ولاد المقبرة ..
اليافطة مين حطها
إتجمعت تعابين ..
من كل صنف ولون
طلعت ديدان الأرض ..
م التربه تندب حظها
وبسرعه جابوا الورق
وجهزوا الأختام
بيشلوا كل طريق
والعدل خد إعدام
حتى المؤبد ع الولاد استكتروه
عدموا اللسان ..
وقطعوا الإبهام
كل الحقايق ..
إتسطرت أكاذيب
والحق متبرمج
مع شلة المجاذيب ..
والروح بتنده ربها للعون ..
تقرصها حيه ..
أو ياكلها الديب
على فين ورايح يازمن
ياللي ابتليت بالعار
الجوع بينهش فى الكفن
وربك الستار
إزاي عاوزني التزم
والعدل مش عنوان ؟
بصراحه لو شفتكم ..
في الجنه .. أخش النار !!

السيد عبد الفتاح

———————————–

الشاعر مسعد سليم

جاوبي يا دنيا
إتكلمي ؟
بتقسي ليه
ع الطيبين !
ولحد إمتى
هتألمي
ونرضى
ونردد آمين
الست دي
إيه جرمها ؟
إن بتسعى
على رزقها !
وإن ما باعت
نفسها !
والمر شرباه
من سنين
ما كان يصح
تغمها
تكسر خاطرها
وقلبها
ممكن تقولي
حضرتك ؟
إزاي ما هزك
دمعها !
ولا طفلها
قلبك دا إيه !
ما أحزنك
دمعة عنيه !
جاوب
يا بيه ؟
ما خوفت
تشكى لربها !
عارف الندم
حس بندم
إلحق وصلح
غلطتك
قبل الشعور
ما ينعدم
وللا تراودك
دنيتك
ربك نصير
المظلومين
وقادر على
المتجبرين
وفيه صراط
مستقيم
ف إزاي
بتغفل آخرتك !