شعر: كرار الناصري _ العراق
واكابلهن واعدهن وارجع احصيهن
واعيد ايامهن وابعد تواليهن
والجمهن واغثهن حتى لذة تصير
شني طعم الجروح الباردة ارحيهن
شربت الندم كاس وبيه اثر لوعات
وصحيت وبقى براسي وضل يفر بيهن
نمت نومة جفي وكالو علي شيطان
وانه النايمات بصدري ادفيهن
واتركهن يجفن جفة المحصود
ويفز خنياب دمعي يروح يزكيهن
ماشربن خمر بس نسمن عالضيم
وسكرن والحقد فارك معانيهن
صفنة مكبرة وليل وسوالف ناي
ودموع الثكالى الدم بواجيهن
وآخ الماله اخو وحسرة العاجر ذيج
وجفوف اليتامه الدمع غاطيهن
هذن كلهن اجن مشية عالباب الدار
وانه طبعي عُرُبيْ ماردهن احويهن
اقرأ/ى أيضا :“اعترافات” قصيدة للصباح والعشق
عذراً التعليقات مغلقة