صفحات من الشعر الشعبى الليبى ملف

صفحات من الشعر الشعبى الليبى ملف خاص

 

صفحات من الشعر الشعبى الليبى كل يوم لنا لقاء نبحر فيه بين لآلىء الشعر الشعبى

العربى والذى ينهل منه الكثيرين، خصوصا وان تراثنا العربى ما اجمله وما اعظمة ..

رمزا لحضارتنا ورقينا  وتاريخنا  الطويل مع الحضارة والبطولة والفروسية والجمال والمعارك من

اجل الحق، وقصص الحب العظيمة ..

وقصص الكرم والسخاء .. وقصص الملوك العظام، والفرسان الاوائل الجميلين. الذين قدموا

ارواحهم فداءً للاوطان.

والاديان والإنسانية جمعاء، كل يوم نحط على شواطىء المعرفة، فى بلد من بلداننا العربية

الشقيقة.

وقد سبق وان قدمنا، بعض  القصائد الشعبية، من بعض البلدان العربية، واحب ان أؤكد ،على

أن الشعر الشعبى القديم .

معظمه مجهول المؤلف، فيدخل فى صفحات التراث تلقائيا، واليكم صفحة من صفحات  الشعر

الشعبى الليبى بكل ماتحملة اللهجة الليبية  من جمال ورقى وعنفوان .(المحرر)

 

صفحات من الشعر الشعبى الليبى

 

صفحات من الشعر الشعبى الليبى

الـمـحـها مـعا غيره هداته .. مــــر سـقـاتـه .. يـتـجـرع فـ اللي داراتـه

الـمـحـها مـعا غيره قدامه .. اغرق فـ ظلامه .. وصـوت بـكـا وهلـع ميامه

ايجـفـف فـ دمـوعه بكمامه .. ابـقـن دمـعاته .. شلآل ايـسيـل فـ خلواته

ايـنــوح كي تنويح ايـتـامـه .. ايـقـول نساته .. في لوعة لشـواق جفاتـه

واتـهـايـت مــرة فـ مـنـامـه .. بـكـا وجــعـاته .. تضحك بقساوة وشمـاتـه

يـنــدب هي عنـه تـتعامي .. دنــا فــزعـاتـه .. راهـا كيـما جـنـيـه جـاتـه

اقـفـز واعـي عينه منظامة .. مــا واســـاتـه .. متـمـلـح ظـامي ما رواتـه

بشـويش ركز على أقدامه .. مــن يــاساتـه .. باس الأرض اللي حملاته

هـو صاحب نخوة وشهامة .. مـوش شـماته .. لكـن نـار الشـوق كـلاتـه

مـتـرنـــح جـاهـا يـتــرامـى .. قـست خـلاتـه .. نزف جرحه زادت طعناته

بقسـوتها حكمـت بإعدامه .. لـــم شــتــاتـه .. هـان وللنــيـــران رمــاتـه

طياح سعـده هـدين أيامه .. هـي نـسـيـاته .. تتشمت في يــوم وفـاته

صفحات من الشعر الشعبى الليبى

والزير شارك دارها موضوعه..

غــــاير عليـــها

جمــــال وفله

اللــــي زينها عالبدر فوق تعلا

تبري المريض اللي شكى من عله

وحتــى الســوايا عندها مرفـــوعه

يابدر من فــــوق السحاب اتجلــى

ياسعد من ترضى تجي في طوعه

حــــاز المعـــاني والجمــــال اكله

وكبــدي عليها فالغـــلا موجـــوعه

وماهــي نقيصه ولا غـــلاها ذلــه

صــارت فقلبي راسخــه مطبوعه

شـــاعر يراجــي من عليها يدله

رضـــى حبها ويريدهـا مشروعه

طغــى زينها كـتل الفراغ احــتله

مع غيرها نـــار الغـــلا ممنوعــه

ومحـــــال عنها فالغــلا نتخــلى

قلبي نتق كسر جميع اضلوعه

 

الشاعر .. ابوليلى

صفحات من الشعر الشعبى الليبى

 

لنا تاريخ نحكي بيه نا …….عزيز النفس مانروم الخطا

مانخضع لحد …..عزيز النفس للصاحب نعد ….

 

سليل اجواد من جدي لجد

مثيل الصقر عياف الخطا

ونسكن وين مالربد قصد …مكاني دوم في قلب السما

وننزل وطن ماطقاش حد …..سراحي دوم في وطن العفا

اهلالي دوم في ساعة الجد ….نقول نعم مانعرفش لا

وحتي كان عاندني ولد …..قليل العرف مامنه رجا

نقول انساه ماعنه نرد….نعده هبل مايرجي شفا

عفيف النفس للصاحب نود … وليه الخير يبقي في هنا

شكري الاصل تاريخي شهد ….ربايه ناس ماطاحو وطا

وراسي فوق وايدي مانمد …..ومانركعش كانش للصلا

فتارغلات وطني ماانهد ……ترابه زين ماكيفه وطا

وبن تليس لينا خير جد …..اصلالة نسب واضح ماخفا

 

 

مايرقد الليل مظلوم

ومايقرب النار دافئ

ولا عالرمل تقدر تعوم

ولاالشوك تمشيه حافي

ولا الصاحب نقدر انخون

مادام قلبه امعاك صافي

صافي النية وحق من خلق المي يا غاليا

نبيك زهي للعين ماد بيا

نبيك غالي مهم اتغيب ما ينتهى مرسالي

وانت على القدار قدرك عالي

عايش غربه…

.وتقول طير يغرد أمفارق سربه

.في وسط وطني اليوم

غريب اديار….
وكبرن اوجاعي زايدات سطار

من خوت كانو رفقه المشوار

تمو عداوة كل حد في دربه

نسيوا ايام العز وسط النار

الواحد علي ﻻخر ايموت ابقربه

ادموع وفرح جن بينا تذكار.

.ايام العطش مقسومنا بالشربه.

.واليوم يانا كل حد محتار.

.والصاحب تلون صار كيف الحربه.

.اتقول بينا ميراث وﻻ ثار

.وين تلتفت تلقى فظهرك حربه…

 

 

هاج البحر ينشد الغالي وينـا…قتله رحلّ بان الزعّل في عينا

ابقى خـاطرى متكــــدّر…لونه تغيـر والكـلام تعذّر

ترابه رقى للسطح صار يهدّر …وهدّت أمواجه لين طقّت فينا

اللي شافني نادى عليا وحـدّر…هاج البحر سوّا بعيد علينـا

****

جيـــت للبحـر بنخبّــر … بللي جرى بالك عليّا ايدبّـر

هـو رقى وانا قعدت نصّبـر … وانقولّه بكره العزيز ايجينـا

نا اللي انكسرته كسّر ما يجّبر …أما البحر مالزين مالي عينـا

 

 

اعلان عن نشر وبيع كتاب اشعار عبد الرحيم صالح

 

خود الخلا ترتاح مره مره

واترك انظارك سارحات بعيد

وخليك ساير ماتبع جرة

وهات لأفكارك كل شي تريد

وياما دسايس للغير ما تورا

ون بحت خايف مالجروح تزيد

كل حد منا اليوم كاتم سره

الاصحاب صارت في الاسرار تكيد

وياحاج اكتم خير ما اتعرا

والقلب يحمل لو كان بالتنهيذ

وخشوش الخلا مايجيبليش مضره

ويبدن افكاري في الاشعار تصيد

 

 

داويت ليام بالصبر

وليام صاعب دواهم

لايقبلوا لوم لاعذر

ومجبور تمشي اخطاهم

يعلوك فوق للبدر

تفرح وتزهى معاهم

ويسقوك امر من المر

تشوف نجمهم في ضحاهم

 

يا مولاي يا رب العبيد ،، زيل الهم عني والشقا

انريد انعيش في الدنيا سعيد ،، ياما ريت فيها من عنا

عشت القل وخلوت الليد ،، نمسا اوقات ما انذوق العشا

وعشت القزن ونا دوبي وليد ،، وعشت الفقد في اول غلا

غلا من كان للخاطر وديد ،، واللي كان لنظاري زها

من فرقاه والوقت الشديد ،، يعسف في ما ريت الهنا

انحق في الناس تفرحبا العيد ،، وانكمل فيه عيدي بالبكا

وكل الناس تلبس في الجديد ،، وثوب الحزن كاسيني اكسا

نطلب فيك يا ربي انريد ،، امغير الصبر منك والرضا

 

جاتك جاتك

مني مشت وبالأحضان خذاتك

الروح ياغالي

مني عـــدت

مشتلك وماعادش عليا ردت

والحب علي غيرك ابوابه سدت

خلت جميع الناس واختاراتك

وياما تحدوها وبيك تحدت

ونجم الثريا فالسماء داراتك

 

فيك تلاقـن

 

كان غيرهن لنظار مايشتاقن

سـمـاحـه وزين وحن

سـمـح اوصـافه

وصنفا ثمين نادرات اصـنافه

امعا كل لحظه ايزيد اريـافه

بو عيون رغيبه لونهن يزراقن

صاف حالي سـرعو فـسعافه

الانظار من غـيبته ماراقـن

 

العـيـن ما تنسى جـمـيل الصـورة

و أنتي صورتك في خاطري محفورة

ما تـنسى جـمـيـل أفـعــالـه

و أنتي صورتك في خاطري جواله

ما تنسى جـمـيـل ألـبــاســه

و أنتي ملكـتي قـلـبـنا و أحـساسـه

و ما يـنسى عــزيـز أنـفـاسـه

و أنتي قـمر ليلي و نجمتي الوناسه

 

 

النوم بعته و السهر قتلني ،، و العقل تايه في الغلا شاغلني

شــــــاغل بالي ،، نسهر نحـــاكي صورته ف جـوالي

نشــاكيه و نحدثه باحوالي ،، ونعاتبه بالمثل ما عـاملني

ننشد وما فارق نهار خيالي ،، امرايف ورايف في الهوى حاملني

 

 

 

 

 

 

نحساب غير الكدب فــه يتعلم ..

طلع يعرفه والكدب فيه امعلم

طلع كداب ..

امألف علي قداش كم اكتاب ..

وزايد رواية حب ليا جاب ..

نسمع لــقوله وهو غير ايفلم ..

يحكي ويروي أقصص ع لصواب ..

ونا ليه مصنت و مانتكلم ..

وهو منسجم بالكدب مايحساب ..

قداش غيره ريت زول امبلم ..

يحلف افقوله ماليش ناس احباب ..

أمغير معدني معروف له امسلم .

. كداب عندك الف م لصواب ..

اتلف خطاني مانريد نا نتكلم

 

 

 

 

 

 

اقرأ/ى أيضا:أمسية شعرية لشعراء العراق بالشارع

 

ﻧﺒـــــﻴﻚ ﻏﺎﻭﻳـــــﻚ ﻫﺎﻭﻳـــــﻚ

ﻭﺍﻟﻘﺴـــــﻢ ﺟﺎﺑـــــﻚ ﺍﺻـــــﺪﺍﻓﻲ
ﻧﻬﺎﺟـــــﻴﻚ ﻧﺸﻜـــــﻴﻚ ﻧﺒﻜـــــﻴﻚ

ﻟـــﻮ ﻳـــــﻮﻡ ﺗﻨـــــﻮﺍ ﺍﺧـــــﻼﻓﻲ
ﻧﻌﻄـــــﻴﻚ ﻧﻬﺪﻳـــــﻚ ﻧﺮﻣـــــﻴﻚ

ﻓـــﻲ ﺣﻀـــــﻦ ﺗﻠـــــﻘﺎﻩ ﺩﺍﻓـــــﻲ
ﻧﺸـــــﺮﻳﻚ ﻧﻜـــــﺮﻳﻚ ﻧﻄـــــﺮﻳﻚ

ﻋﺎﻟﻌـــــﻬﺪ ﻧﻠـــــﻘﺎﻙ ﻭﺍﻓــــﻲ

 

 

 

ياالهايمة في القديمين ..

يا الحاملة قدح ناره

يالعاشقة للتغونين ..

 

ياالذاهبة في ادياره

ياالغارقة بين نارين …

 

يا الذايقة من امراره

يااللايمة ع المراهين …

 

يا مخرفة يا خسارة

ياالتايهة بالله وين ..

 

نلقى عزيزك وداره

يامرايفة للمحبين …

 

ياالعايشة في صغارة

زعم جابهم دمع الحنين …

 

اللي بصر ع الخد داره

زعم يقسموا اللي مراهين ..

ويعود ميرنا في عياره

اللي ما قسم كيف العوين ..

مع الريح راحن اخباره

ليش ناصبة نوح يا عين ..

وانتي سبايب اقهاره

تبعت رايك الشين ..

حصدنا الشوك من ابذاره

إلا العقل منك حزين …

 

ومن ياسهم طاحن اسواره

اللي قبل حصنه حصين ..

وماله معارك خسارة

وله هيبته بين الخرين ..

وله صيفته وله اقداره

اليوم تم منك دفين ..

بعد كان موعر اعصاره

قعد حالته كيف السجين ..

محكوم ظلم في قتل جاره

وقعد مسخرة للشواطين ..

وسواسهن مابا ايتواره

ايجن ف الخفا ايديرن زنين ..

ايخلن العامر دمارة

وكم شاب كامل الزين ..

طاح في شركهن توارى

مديون والدين شين ..

زارينه وماله ادبارة

جا الليل جاب الجرانين ..

وخذا في اهمومه اشواره

مرة شمال مرة ايمين …

وسواسهن جرن افكاره

نين طب في الراي الكمين …

من قبل طلعة نهاره

لقيوه هله مخنوق نين ..

وحلوا افكة ازراره

تباع راي الشواطين ..

ما يوم يكسب اتجارة

وتباع رايات عين ..

 

ايسوقه السوق الخسارة

 

 

يا بلادي..

غناوى الحرية

للشاعر : الاجدابى

[1]

 

(( عليك دار كْنتي دار.. وعليك دار  يادار باقيه!! ))

في الجوف غصة..

قد أسكن الحزن فيك..

ألف قصة

هودج للعار قد زف الفضيحة..

والزناة يعلون المنص !!

[2]

(( حديث بلا معنى سفاهه ))

 

هذا الذي أمامكم..

كبهلوان في مظهره !

يُفرغ ما فيه بغضاً وهزيمة..

هذا الذي أمامكم..

حديثه حشرجة..

وجهه..  لفظه ما أحقره

هو أمامكم  يموت كل يوم..

وأنتم..

من سيحفر المقبرة !..

[3]

 

(( ننْسوا عزيز وْين إنغْدوا… بالفاْضله اللي منْ عمْرنا..

لا يرحل الوطن عنا .. وإن رحلنا ..

نرفع لواءه كل صباح

وفي المساء .. هو الوطن

يسكن الحلم و يحضنا.

 

(( الإجدابي))

 

بدرية ابراهيم اللأشهب

من مواليد مدينة بنغازي – 1952

حاصلة على إجازة تدريس خاصة – إجتماعيات

مدرسة بمرحلة التعليم الأساسي

 

صدر للشاعرة:

نقطة ضعف

أوراق خاصة

 

ومن إصداراتها الصوتية:

ديوان شعري مسموع

مجموعة أقراص للأطفال

صدر لها ايضا مخطوطات: السبحة والمنديل

 

 

 

 

ترفع ليش ياوقت الوضيع =وليش اتذل بالعازه ارجال

املبس ليش تاجك لللكيع =وتطعن ليش في صيت بواهلال

وتستر ليش من عرضه يبيع =وتفضح ليش في قلة الحال

اتحلل ليش فالرزق المنيع =اتباعد ليش في رزق الحلال

تذكر ليش مالذيلي الصنيع =وتنكر ليش للفارس افعال

اتمجد ليش من لبست خليع =وتشتم ليش من طقة اخلال

تقهر ليش فالحمل الوديع =تنادي ليش للقرد بغزال

اتجامل ليش فالوجه البشيع =وليش اتذم لوحه للجمال

اتبكي ليش فالطفل الرضيع =ادلل ليش في ناساً ارذال

امدنقر ليش لنذالك اطيع =امفنص ليش في وجوه عقال

تعزم ليش ع الخير الشبيع =وحاسد ليش فقري ع الخيال

بوجاه ليش بايت فالصقيع =وفقصور ليش امنعم انذال

مجدب ليش في فصل الربيع =وقاصر ليش في قوة العيال

امكثر ليش من نسل التبيع =امشوهي ليش تريسك اقلال

اتصغر ليش من قدر الرفيع =الرزان ليش جبتا لنخال

الاشهب ليش فالقاعه رتيع =امحجر ليش الاربد بوانعال

خايف ليش مرموحه اتضيع =وطايب ليش موسك لجمال

امشوخ ليش الابكم والصريع =الشوخه ليش بقيتلك ابمال

وليش ابقيت تبحث ع الرقيع =وتسفي ليش ع التبر الرمال

 

 

 

 

عٓجِجْ عٓليـِهُمْ يآعجٓـاجْ أعْميِـهُمْ

جمِيعْ منْ وقٓـفْ فيِ وجِهْ منْ نبيِهُمْ

إِرْدِمْهُـمْ رٓقـِي ترٓاابكْ فووووقْ مآترْحمْهُمْ

يٓــاريتْ تـجِي عٓـاصِفٓهْ تـبرُمْهُمْ

تٓخلِيــهُمْ دوٓايِخْ فيِ الخٓـلآ تِخْليـِهُمْ.

يوم أثنين ثالث بالكثيـــر …. ننسا كل من ينسا غـــلاي

عند الغدر ما عندي ضميــــر … ولا ما أتشوف يا خاين أبكــــاي

قلبي صاح من جوة كبيـــر … اللي نهواه يبقا في سمــــاي

لاكن راه ما يحمل سطيــــر … ويحذف كل من يخطا أمعـــاي

أتجيني بخير تلقا كل خيـــر … أتجيني بشر تتعب يا أمنــــاي

 

 

غريق بحرها .. وسع عليها وقول ما نقدرها ،، معايا الغلا دنيا

غريقه بحــورى ،، نا ننصحك بالله مـا إتجى شورى

ولازم إتغادر دنيتى ضرورى ،، والعين بعـدك عالجـفا نجبرها

غريقه إبحـورى عاليات أقصورى ،، صعيبه عليك إنكـان بدمرها

 

اتمنى ان تكون قد اعجبتكم تلك الجولة الجميلة بين جنبات بساتين الشعر الشعبى الليبى

على امل ان نتواصل فى ملفات اخرى ببلد عربى شقيق اخر لنسعد ونستمتع باللهجة

والحرف والمفردة والصورة والحبكة زوالموضوع ونحاول ان نقارن بين اللهجات المختلفة ونصل

فى النهاية  للهجة الشعبية العربية القريبه للفهم بسرعة لدى الجميع وسنكتشف ذلك جليا

من خلال الحلقات القادمة من  ألوان من التراث الشعبى العربى .( المحرر)

 

ملحوظة: معظم القصائد المنشورة هنا ليس لها مؤلف .. او عندما نقلتها لم اجد اسم المؤلف

معها .. لذلك من يعرف من القراء أسماء المؤلفين للقصائد المجهولة المؤلف يتفضل مشكورا

بتوضيح ذلك حفظا على حقوق الملكية الفنية لكل شاعر . مع  وافر الشكر  والتقدير لقراء(

الساعة 25 ) الاجلاء .

ونترككم مع هذة الأغنية من التراث الليبى ايضاً

 

صفحات من الشعر الشعبى الليبى

 

قد يعجبك أيضا:

https://www.youtube.com/watch?v=qgLDrZXFPys

الساعة25 تفتح ملف الشعر الشعبى الليبى وتحاور الشاعر أشرف الزرقانى

الوان من الشعر الشعبى الليبى

الشعر الشعبى الليبى فى وصفه للنساء