صفحات من التراث التونسى ” شعر شعبى .حكايات .أمثال ” ملف
كما تعودنا ،على صفحات محبوبتكم الغراء ” الساعة 25 ” أن نجوب البلاد العربية، ونطوف فى بساتين أشعارها القديمة، ونتغذى على رحيق امنيات عبيرها، من خلال كلمات الشعراء القداما، الذين عبروا بصدق عن تلك الحقبة الزمنية التى عاشوها ،من خلال أشعارهم األأصيلة ،ورسموا لنا الطريق للعبور الى دروب تقاليدهم ،وعنفوان مجدهم ، فالشعر خير دليل على حضارة الشعوب ورقيها،وفى العصور الماضية ،كان الشاعر هو المتحدث الرسمى بلسان القبيله، لأنه الأكثر فصاحة والأجمل تعبيرا، من خلال موهبتة التى منحها الله اياة، فكان دوما معبرا صادقا ،فى وقت الشدة ووقت الفرح ،وكان من خلال نصوصة المختلفة، ومفرداتة السلسة، وصورة الصادقة ،يستطيع ان ينقل لنا الظروف والاحوال المعيشية والحياتية ،لهذا الزمان او ذاك،ودوما اذا اردنا ان نطلع على ثقافة شعب وحضارته، يجب علينا اولاً قراءة ديوان الشعر لديهم، سواء كان شعبيا هذا الشعر أم فصيحاً، . واليوم نقدم مجموعة من الأشعار الشعبية التونسية ، بالطبع قمت بتجميعها من هنا وهناك، منها ماوجدت اسم الشاعر عليها ومنها من لم اجد اسم المؤلف عليها، واكرر من يقرأ عمل أدبى بهذا الملف ،أو الملفات السابقة، ويعرف صاحبة علية ان يرشدنا لذلك ،حتى نحفظ حقوق الملكية الفنية له، ونوثق العمل باسمة ، أدعوكم لجولة روحية جميله بين صفحات هذا الملف، للشعر والحكاية والمثل الشعبى التونسى، لعلة ينال قبولكم واعجابكم على أمل مداومة مثل هذه الرحلات الجميلة والممتعة دوما وابداً .( المحرر)
من الشعر الشعبى التونسى
عرمة ذهب طحت بها جمام * تحت الحرام
ترصدت وجي رصدها في حزام
—–
عرمة ذهب طحت بها دخيرة * خزنة كبيرة
ترصدت وجي رصدها في المريرة
جاني لحبيب قال خوذ النذيرة * قول فيه خيرة
على جالها حرمت نوم الميام
—–
عرمة ذهب طحت بها خزاني * وراتها اعياني
ترصدت وجي رصدها في العكاني
لا صبتشى حبيب شاطر ال جاني * قلبي شواني
على خزني باش تمشي حرام
—–
عرمة ذهب ناي وهي وحدنا * حزايم جبدنا
تفيتح فتح رصدها كي رقدنا
لحزّار غايب لامن فقدنا * غنمنا سعدنا
لين علّم الفجر و راح الضلام
—–
لين علّم الفجر ولّى صباح*لا من ارتاح
والديك عل لربعة اركان صاح
لامن وقف شافنا في المراح * كحيل الشباح
هي الذي مزودتني غرام
—–
هي الذي مزودتني محون*كحيل العيون
الزين من زينها حاسدون
المساوي علي ينسب يكون * اديب يافهام
من اولاد جمال ناسو كرام
ناس الذي أيسوا الطب يـبـروا — ارضاوا صبـروا – و استحمدوا ع القضاء لين جبروا
—
ناس الذي أيسوا كيف مرضوا – ليس اعترضوا – و استحمدوا ع القضاء بيه يرضوا
بنادم ال ما يضيّعش فرضو – مستور غرضو – لا يـحشمو الله فـــــي عند كبرو
—
ناس الذي أيسوا الطب تعالوا — للحق مالوا — و استحمدوا ع القضاء لين نالوا
بنادم من كان فسدت فعالو – يوكّل احمالو – ع الغير ولاثــــــــــم من سمع خبروا
—
ناس الذي أيسوا طب داهــم – ربي هداهم – و استحمدوا لين بــلـــــغوا منـــــــاهـــم
امّا الذي استعجلوا في خطاهم – ربّي وطاهم – شوف للشياطين من قبل عـبـروا
—
ناس الذي أيسوا الطب زدموا – محال ندموا — استحمدوا للقضــــــاء ليس عدموا
الّي ملك ألف ملكه تهدموا – طاحــوا تردموا – وما حاز في لرض كـان قد شبرو
—
ناس الذي أيسوا الطب فاعوا – هداوا و راعوا — استحمدوا للقضاء و أوجاعو
كلام القفا عند وافي اطباعو – حس بـأولاعو – كـــــانو اماس الحجامه يــهــبروا
—
ناس الذي أيسوا الطب راضوا – ليس استغاضوا — استحمدوا للقضاء لين ناضوا
شوف الفراعين من قبل هاضوا – ياسر اغلاضوا – لـــــوّج على حيّهم ويــن غبروا
—
ناس الذي أيسوا من علاجو – صبروا تراجوا – استحمدوا للقضاء كي احتاجوا
هكّه حكي ولد موسى انساجو – يصعب هراجو – منو جميع الـمـضايع انـدثــــروا
وللبدو في ملافظي نصنج – نجيب قول مشيخ موزون وزن سنجة
عللي اسمها في فمي ممدوح بالتربج – هي فايزه فالمحفل وتاتها القمجة
غثيث اسود زنجي علي جبينها معرّج – و الحواجب هلة زيد العيون غنجه
راعف الممحونة راعف الطير لغنج – خدودها محمرهم كما الورد فرض ولجة
في غسيق الظلمة كى البرق وقت يلعج – نيابها يا فاهم تبرور عقب ثلجة
ريقها للعاشق خمر الذي يبنج – لينو الدواء والليعة للي سكر بنجة
رقبة المعشوقه بقلايد الزمردج – زنودها يا فاهم سيفين يوم هرجة
عالصدر يا صاغي تفاح كيف برهج – علي الوقف كي وقفوا عالصدر كي الترنجة
معذبتني ديمة بحزامها المرهوج – وقت الذي نشوف إلها نهبل نزيد هرجه
خفي زينها لاتنتج هالعازبه ختلج – سبحان من صورها مولي القضاء و فرجة
ناي ريتها بعوني للنوب جات تدرج – كي لحمامة تمشي في مشيها الفرجة
غنبوزها متقي دوباش ما فجج – بلحظها غمزتني ام العيون غنجة
مرسولها دزاتو فالحين جي يلوّج – وقت الذي نداني كما عيد يوم حجّة
جيتها في ليلة و عجاجها معجج – نلقها فيا ترقي عقب الغسيق ترجي
تمت المسديه في شغل ه المنسج — منشهر بكلامو علعراف فاز درجه
بالفاء اسمو ظاهر الراء رتب خرج – الجيم هو الثالت يامن قري تهجى
اسمو فرج متسمي ناتج انتج نتج – من صغرتو متسمي صاحب غني و لهجة
يا الاهي طلبتك علي من طلب فرج – انشاء الله تكون اماتي امين يوم حجة
صلوا يـا حضرة ** على خير الأنام ** أتانا نصرة ** نور الإسلام
رضوا على العشّرة ** أصحابو لكرام
1 صلوا جمله يأهل الإيمان – علي محمد شرحة لذهان
إلّي رسلو لينا الرحمان بالوداعة – وقام الشريعة بين لوطان بالبراعة
2 بفضلو انهلكوا جمع الطغيان – إلّي كفروا وعبدوا الصلبان
أهل الجور وناس العدوان و الخداعة — هلكهم ربي راحوا طشّان ال ه الساعة
3 كل من طغي وتجبر و اخشان – وعبد غير الحيّ الديّان
انزاد ليه الهادي العدنان بالشجاعه – خلف دمو ينزف غدران ياجماعة
4 لوّل كسري وبنو شروان – أنهد قصرو طاحوا السيسان
وبحيرة ساوا بعد الهيجان و الخلاعة – انزح ماها رجعت للان لتو قاعة
5 زيد نار فارس بعد الشعلان – انخمدت باذن العالي السبحان
كسري وهق ونادى الكهّان الهم لاعه – انطقلوا بكلام بيان بالسراعة
قالوا ياكسري ** نحكيلك بكلام ** وانقلك خبرة ** غاناتك ليّام
انزاد سمح البشرة ** و ضوك ولى ظلام
1 صلوا جمله يا مستمعين — علي محمد جد الحسنين
إلّي انزاد ليلة لثنين البدر لزهر – في اثناش من اول شهرين ربيع الانور
2 كي انزاد الهادي لامين – لملاك الكل جاوا مجمولين
لبسوا حلّة مالجنّة تزين حرير اخضر – من نوره ضوات البدرين و الكون أعمر
3 السيّده حليمه فرحت فالحين – جاتوا مدّت ليه الثديين
ترك ليسرا خذي ليمين منها تصدّر — جدودو و اعماموبيه بيه فرحانين ليه تنظر
4 روحت حليمة بسيّد الكونين – سمعوا الكفره اعداء الدين
علي قتلانوا جاوا متفقين جيش مكثر – تحرقوا قعدوا فالبين بالنّار تزفر
5 ببن السعد بداوا مفتخرين – بمعجيزات الهادي لامين
زهي العام على كل سنين السيل غدّر – بدات قابه قوصين جي محدّر
وشاف عالي القدرة** بالقلب و لميام ** اعطاه الفخرة ** فوضلو لحكام
ويجاهد ف الكفرة ** باذن العلّام
1 صلوا جمله يا إلي حضّار — على محمد شارق لنوار
إلّي كاد جميع الكفّار بالصوابة – تبعوه العشره لـخيّار من صحابه
2 بوبكر لوّل صديق المختار – و عمر الثاني فالحق يشهار
وعثمان الثالث سيّد يذكار في خطابه – وعلي المتسمي البطل المغوار في حرابه
3 مولى الكوت العاتي الجزّار – ناقل السيف ماضي لشفار
ماذا هلك جيوش الكفّار لتو قـابه – كل من عصي و طغي الجزار ما يــهابه
4 تبعوه بنيّة السته لنصار – إلّي عبدوا الله ليل مع نهار
نتوسل بـيـهم لله الستّار فتّاح بـابـه – يكون لينا الهادي فالجنّة جار في تـرابه
كل حد و قصره و الحور و لنعام ** و طول معتبره فيها كل طعام
و غلل و ثمره ما فيها تذمام
1 صلوا جمله يا كل حضور — علي نبينا الهادي المبرور
إلّي جاء للبيت المعمور زاد علاّ – لطباق السبعة وحجب مالنور رقاه كلّه
2 انطلع و شاف وحقق لومور – وجاب الشريعة و شرع المنشور
كل من عصي بقي مكسور من غير علّه – طول عمروا وهو مقهور فالمذلّه
3 إلّي انطاع لنبينا المبرور – بنالو ربي فالجنّه قصور
وبنات بكر صبايا من الحور مثل هلّه – ومياه تدفق في مثل بحور سبحانو جلّا
4 اشجار تلاغي فوق منها طيور – وخيرات الجنّة ياسر مكثور
لافيها باطل لا باي يجور بالمحلّة – لحكم ربي يرجع الشور من غير زلّه
5 احمد السماوي ننسب مشهور – يا الاهي تجعل ذنبي مغفور
وعند التوسل مابين لقبور ليس تذلّه – وبحسن الختام يـبدا مستور شهيد بالله
من الدنيا نبرا وننجا مل الهيام ** بالشفاعة الكبرى ** بجاه خير الأنام
بجاه سورة بقرة ** و الكاف وااثنعام
مرحولها يـــا سيدي من عقب الليل ساق – و نقلوا بالزينة ادرجيحة الــــطليق
صاح الطبل ينقنق وتراوغت النيــــــاق – و سبقوا جديانه والسعي الذي رقيق
زودوا و انزاحوا من تحت غيم لشفاق – لا يفروا رادي ولا يـعتقوا لــــحيق
لا يحوم الطاير لا وين تخطم الســــاق – لا قلوب يحنوا لا يــــعرفوا صديق
عالبلاء يتكنوا والحرب و النفــــــــــاق – كلامهم يتراعب بقـــــواطع الزحيق
قعدت غير انخمم حسيت خـــاطري ذاق – و كل ما يستاسع عندي بــــــدا مذيق
لا خبير معايــــــا لاثمشـــــــــي رفــــاق – وفج وهجه كسى مــــا يدخلى رفيق
في ديار مرادي نلقى الوحوش فـــــراق – لا اصوات تواجب لا تصطغى نقيق
يا لندا وين اهلكم وينهي ضريفة الساق – القلق واخذني والوحش مـــــا نطيق
وخلفت الاماير و فهمت الاتفــــــــــــــاق – كان ما نلحقشي مــا نتسمشي عشيق
اشتد امر هوايا دمعي جري دفــــــــــاق – لا بقيت نفرق لا صـــــــح لا غريق
فالشهر الثالث تبين عجاج تـــــــــــــوّاق – عقد خيل تبين بانوا على الــــرميق…
مرسولها عارضني واعدتني باللحــــــاق – غابت الحزارة في عـــاقب الغسيق
حين شاورتلها مرصوعة الطــــــــراق – قامت و عرضتني و دليلـــــها زهيق
ززت ناي وياها جي لعبنا سيـــــــــاق – على الوفاء و الهمّة و العهد بــالوثيق
حزت مافي بالي من بعد لشتيـــــــــــاق – لزيت نهد عضـــاها مــزيت مالعتيق
قالت افصلني قرّب الليل عالسيـــــــــاق – اعتزل فـــــي امرك من خفية الوبيق
ما مر نار الفرقة ســـــــامورها حرّاق – شيعتني قالت مضمون يـــــا عشيق
يبقي علينا ستره رب العبـــــــاد خلاّق – هو يشيل الغارق في ســـاعة الغريق
هكّه يكون المعني في شـــارح الطراق – علي الملز و العنس حكم خذا الطريـق
وفاض بحره كسي تحت الثرا غرّاق – كل شـــــاعر ذيل منّـي غدي وهيــــــــق
اسمو احمد بن موسى على كل شيخ فاق – في ملمة لدبة يبست كــــــــــــل ريق
هذا السلام قريتو على صربة النقنــــاق – والصلاة على لمجد كمـا العنبر العبيق
البلغة المقفولة لبّاس البلغة المقفولة
جانا مرسوله بالسيف علينا نعنوله
لبّاس الهافي * يا ريافي * غيّب عل عيني * و ما ريته
نشكي لسعافي * فالخافي * و نخلص ديني * من بيته
انخش الرفرافي * نبات دافي * لامن وعّاني * لا فريته
نغنم في زماني * تخباني
بو غثيث مقاني * درباني
الداعي شقاني * و كواني
شوفو ما عتاني * يا خوياني
فالليل الثاني * خلاني
بصوتو نداني * كلمني كلمة معقولة
البلغة المقفولة لبّاس البلغة المقفولة
جانا مرسوله بالسيف علينا نعنوله
كي نادى مرادي * يا سيادي * يـــــا ماحلى صوته * و ما بـنّـه
ناى عليه تعدادي * جي حيادي * لاشب قدانــــا * ريّــــــنّــا
حبو فدفادي * جلعادي * جوف العصرانه * درولنا
جوف الصبّارة * جعّارة
تقول بنت انصارة * مختارة
تمشي تتواره * هنكارة
الوشمة فالفارة * زنزارة
لا اتيق عزارة * نغّارة
لا تحب بصارة * كان الّي تعشق في زوله
البلغة المقفولة لبّاس البلغة المقفولة
جانا مرسوله بالسيف علينا نعنوله
كيفاش عملتي * ماك قلتي * الليلة نعنالك * من قبلة
أش بيك غفلتي * و همّلتي * ليلة ميجالك * يا لاّلة
و علاش بخلتي * و بطلتي * ركزة خلخالك * فالفلّة
كان بخلتيني * يزّيني
كيف وعدتيني * يا ديني
كيف جرحتيني * داويني
صغير عديني * خليني
نخلص في ديني * يا بيني
راك قهرتيني * زنودك سيفن مسلولة
البلغة المقفولة لبّاس البلغة المقفولة
جانا مرسوله بالسيف علينا نعنوله
هيّا ممحونة * ممكونة *فالحب جديدة * تترامه
ربي في عونه* مقزونة * في دار بعيدة * الزدّامة
ذبّال عيونة * المزيونة * بيّتني بيده * في حرامه
بايت في حجاله * ودلاله
نفرعس في خباله * في حالة
صف الرجّالة * ها دّاله
جيناك قباله * ياخالة
محمد في حالة * وانت ماتكونش مهبولة
البلغة المقفولة لبّاس البلغة المقفولة
جانا مرسوله بالسيف علينا نعنوله
محمد الصغير الساسي
ذعت التصـريف للذي يعلم لحـــساس ** تجري لقدار باش تتسبب لسباب
في لصـل اصـل كل بني يحب السـاس ** كذالك الخصمين كل واحد ليه جواب
طريق العـجب اتركو كــــار الوسواس ** أعوذ بالله مل الذي يدعي بالإعجاب
مــن غير دليل شـــاف روحه ما يقياس ** من غير صواب جاء يحكم ع الأقطاب
إلّــي معكوس لاش يتعاطى اا عكـاس ** و إلّي مقرود ما عاد ليه مناب
و إلّــي مقصود لاش ينقض عهد الناس ** و إلّي مغلوب لاش ينغر مالغلاب
و إلّـــــي مزنوط لاش يهدي عالفلّاس ** و إلّي سرّاق لاش ينغر مالقلّاب
و إلّــي محبوس لاش يحمق عالحبّاس ** ضرّاب الدف لاش يهدي عالـرباب
هموم زمــــــــــان زادو قلبي هلواس ** ولالي مقط مل القعاد حذا الأصحاب
أنا لو صبت فارس واحد ليه قيـــــاس ** في فصل الحرب يحفظ معايا الأبواب
نتجنبلو و قـــــولو مــافــــاها بـــــــاس ** لاكن تلقاش من يرد عليك جواب
قــــــاصد وقصيد قاصد البحر الدهّاس ** أخر مقصود هل الأعمى جي في زرداب
قسيم ثوامر
احمد بن موسى
ما بقـى في الدنيا للعبد ما يشوف – لا خير ال تسمع ما عاد ما يسر
من عقوبة ربي ما عند ناش خوف – من وقوف المحشر ما عندنا حذر
اشهد انت لول ثماش من يشوف – في طلوع الهلّة لا من يرى الشهر
نزيد نايا نقلك ما عاد من يروف – تاركين الطاعة على مدّة العمر
كل درّهم طار ماليد خلا الكفوف – اذا تصّرف راح من ساعته غبر
لاعدنا نتفجعوا اذا نشبحو الكسوف – ولا عدنا نـهـتـموا من قلّة المطر
ولاعدنا نترعبو حتى من الخسوف – لامن ينهي مؤمن حتي اذا كفر
كل من يتقدم لقراية الحروف – ينشد على الراتب قداش فالشهر
كل من يتوجه للحج و الوقوف – ينشد ع المتجر في أول السفر
إذا احرم و تقدم للبيت جي يطوف – تحل بيه شواغل ويعود يفتكر
فى الزكاء يتقسط تنزادلو ألوف – والفلاحة صارت ماتخلص العشر
لا علالش نعجة ولا جزة الخروف – ولا بقت طميعة في مكسب البقر
لابقت مراعى ال نحلة القطوف – نسمعوا بالنخلة مانشبحوا التمر
صار عقلنا لاهي بلهجة الكيوف – بكلنا نتجذبوا على نغمة الوتر
لا بقت انزالي تقصدها ضيوف – ولا بقيتش تامن إنسان من غرر
لابقى من ينجا حتى بجلد صوف – و لا بقي من يسلم م الحسد و الضرر
اذا قصدت نصيحة نسبوك للكلوف – و اذا تعمل حسنة ولات فعل شر
اذا قصدت واحد ثماش مايحوف – اذا صحبك لصقك ثماش ما تدر
السلف من حينك ارميه للتلوف – ريت كم من بيعة ماتخلص الشطر
اللي يجي يتكلم يرموه في محدوف – و اللي يطلب حقّه يطيح في حفر
اذا حصل و تبلع ما يصيبشي كتوف – لا بقي من يخزر لقداه بالنظر
كل من جا ينشد يضرب على الدفوف – وكل ماهي كلمة نبنيو لها قصر
المرا ما تحشم لين تقطع الصفوف — الصغير ال يقنص و الشايب ما جعر
المعيشة صارت ميزان بالصروف – الفقري اذ اتعشى ماتحسبه فطر
القوت ولى عجرم صار كما السفوف – من شديد الشدة لذيذ الطعام مر
الدرك فالعيشة و الزحام بالكتوف – الجدب في الصحرا و الصب فالبحر
خط خطك و اعطف ياضامن العطوف – الكلام لبعضه لاقيه و اعتبر
زيد ولّي و ارجع لمنازل الرصوف – تلقى حساب مدقق اصح م الحجر
تقلبت الحقايق للسنة سيوف – بعضهم متقوي الكبر و الفقر
الفصاحة قلت اندفنت الحروف – كل شي مقيّد يا تعس من كفر
العقول ضعافت مشت للتلوف – و الجوارح كلت من ساير البشر
ما بقي ما ينفع خمم ترى وشوف – الرواية صحت اخر الزمان شر
ما بقت هشاشه تعسرت الظروف – راحت على من راحت شئ ما ظهر
بيّنت لك بالواضح لين بان بالكشوف – هيهات على مافات ماعاد ينذكر
لا اله الا الله المالك الرؤوف – محمد رسول الله هو سيد البشر
بالكرام العشرة و بن طالب الموصوف – بشهرك المفضّل و بليلة القدر
باهل بدر كذالك و غياثة المهلوك – اللي ذكر سماهم امنع مل الكدر
و بـحبابك جملة صلاح اهل شوف – و بالعالم التيجاني القطب المنشهر
يا رب نايا سالتك جود علينا روف –ياعفو يا غافر يا عالم بكل سر
الله لا تواخذني بالهفو و الهفوف – نصيحتنا بيدك احنا ومن يبر
فرج عنّا كربك وجود يا عطوف – ما تخيّب عبدك في يوم الحشر
و يسّر معيشتنا اجرنا من الخطوف – كل شي بيدك اليسر و الفقر
اسمي حمد بن موسى ذباد فالحروف – ترحمو يا ربي في غمّة القبر
السلام قريته على اللي هنا صفوف – على قد برق ال شيّر و ما صبت المطر
محل شاهد
القمح الصافي ما بولي كرفة * و ولد الطاوس مايولي بومة
عود القماري ما يولي قرفة * القول صحيح خوذ منو علومة
الكف عمرو ما يعاند اللشفة * البحر عالزحاف يصعب عومه
اللي جاهل لاش يثبت عرفه * كل مدرس لازماتو علومة
المتهور ليس يعرف صرفة * والمتهذب فكرتو منضومة
جل الناس اقوالها مختلفة * خوذ كلامي ما ادير خصومة
كل عوج يبان ليس يخفى * ليه حجة واضحة متمومة
الابن قال لبوه نولوا شرفة * قالو حتي تموت كبار الحومة
اللّي عشق فاطمة كيف يصبر :
المرحوم محد العيّاري
—
اللّي عشق فاطمة كيف هيّا ** ذهنه تفيّا ** يذوق الحدج كاس من سم حيّه
من أولاد عيّار و الشّعر ليّا ** بحوري قويّه ** في قوم لزفات بايت نجزّر
طــــــالع بــــــرق
البرق يشــــــالـي – شعشع بضيــــــــاه
والرعد يكــــــالـي – حرجان في سـمـاه
شيعت نتجــــالـي – جي سابق مـــــــاه
ومسدسة
لعج لاج برق النواضير يخفق * رعوده تبردق* و سيلو علي حي مشكاي يدفق
—
لعج لاج برق النواضير يلهب * سحابو مركب * وسيلو علي حي مشكاي يقعب
القد بين لبكار يرعب * في مثل سنجق * تايقة على كل خودة عنقنق
—
لعج لاج برق النواضير شعشع * رعوده تقرقع * و سيلو علي حي مشكاي يدفع
سبحان من خصّها كيف تطلع* على كل معشق * تحكم بحكم السلاطين تشنق
—
لعج لاج برق النواضير برهــج * سـحابو مبّرج * و سيلو علي حي مشكاي يمرّج
من شافها قليل يهني تمخوج*وقلبو تحرّق*وجاشو على كل شيرة تمزق
—
لعج لاج برق النواضير بهّر*رعوده تقهقر*و سيلو علي حي مشكاي يهرهر
وجي دونها صيد لـجبال يزهر *رجال ال تحمق*صناديد في يوم شهيلي مرقرق
—
لعج لاج برق النواضير ضوا*رعدو تقوا*و سيلو علي حي مشكاي روا
وسبحابو من والف الطير جوه*كيفاش يخلق*وفي زينها واصف وما تحقق
—
من زينها يبات قلبي عليل*و حار الدليل*بالزين فازث علي كل جيل
بالله يا طير دير لي جميل*طير و صعفق*سلامي على الفور من السعد لزرق
نـجع الّي رحل بالوليفة تنقّل * علل الفجر حوّل
روّد نزل الوطن عشبو مـخبّل
—
نـجع الّي رحل بالوليفة نقل * ساقوا البل
روّد نزل وطن عشبو حفل
زازو برور مرتع النحل * كثر العسل
في ديار هاك الربيع المدلّل
—
نـجع الّي رحل بالوليفة دراق * علل الفجر ساق
روّد نزل وطن عشبو عتاق
جلعاد ساقوا جــحاف النياق * تلموا الرفاق
و الخيل تحت الفراسين تصّهل
—
نـجع الّي رحل بالوليفة تعداّ * علل الفجر ودّا
روّد نزل وطن بــرّاق خدّه
و ريم اللّي غثيثها كي تهدّه * حسابه نعدّه
جي قد طول قامة وكمّل
—
نـجع الّي رحل بالوليفة مشوّر * علل الفجر ثوّر
روّد نزل وطن عشبو منوّر
بدي السعي ف البساط المبوّر * يرتع اتدوّر
و البل مل خلفتشي المخوّل
—
نـجع الّي رحل بالوليفة عزم * علل الفجرهم
روّد نزل وطن عشبو عرم
زازو بلاد الهني و النعم * عرب الخيم
في ديار هاك البساط المقدّل
—
نـجع الّي رحل بالوليفة يسير * ساقوا المرير
روّد نزل وطن عشبو كثبر
العربي النجّار شاعر كبير * منو تحير
في معنة الشعر ديمة يشتّل
عروبي
تـكـلـم صـطـع صاحب الـدي – و مــل الغرب نـقـت رعوده
خـلـطـــها مـيـت مــع حــــــي – و اليــابــس أخضـــــار عوده
الله قــــــــــــــــادر و قــــوي – يـنــــــعم عــليــــــــــنا بجوده
مسدسة
قـمـقـم درز كت صادي رزم * ســحابه دكــــم
و البـرق من كـــــــل جـيــهة دحــــم
—
قـمـقـم درز كت صادي عصيف* ســحابه وصيف
و البـرق من كل جـيــهة خطيف
بدات الـمطر فيه تنــزف نزيف* فـــــأول خريـــــف
تكـرّم علـيـــــــنا الـــــمولي نـــعم
—
قـمـقـم درز كت صــــــادي درز* ســحابه يدز
و البـرق من كل جـيــهة حفز
العشب والزرع من لــــرض فز* طار القــــــزز*
الناس يتناطروا فالـــــخدم
—
قـمـقـم درز كت صادي ضبح* ســحابه ركح
و البرق من كــــــل جـيــهة شلح
الفلاح بعد الشدد كيف راح *بـزوزه نفــــــــح
فـــــــي البور قصد عنهم رشم
—
قـمـقـم درز كت ه يا اسلام * ســحابه دكام
و البرق من كل جيهة دحــام
بداو الطيور يضبحوا بالغرام * جمله تـــــــــــمام
كـــل طير جايب معانـــــي الفم
—
قـمـقـم درز كت صادي غصب * ســحابه ركب
و البرق من كل جيهة نشب
البنبلي جـــــــــاب لفظ السبب * اسمو رجب
في معنة البــــرق شاعر نضم
تشويت من لـحظ سود العيون * شربت الـمحون * نوم الدجي محرمـــه مالـجفون
—
تشويت من لـحظ سود الشباح * تجرعت القراح * نوم الدجــي محرمه لصبــــــاح
جرالـي كـمــا فارس من الصرج طاح * نهار المزاح * نهار الذي غنموا الغـــنام
—
تشويت من لحظ سود النضر * ززت القفر * نوم الدجي محرمه مالجفر
جرالي كما ميت ساكن القبر * فاعل الشر * لبسوه لملاك ما عاد قـــــــام
—
استغفت لله عالي قوي * علينا غني* الّي مـــا لقش لبنات ما شـاف شئ
في جرة اللقي حرم الهني * عرب البلي * فـــي ليل دامس مكسّح ضلام
—
في ليل دامس غامق الضو * شتي و نو * يصدم على زميم صـــف العدو
المرّار فالفم و يلّــي حلو * ينال السعو * يغنم من زول زرق الوشـــــــام
—
يغنم من زول برم الخجل * يحل القفل * هذاك صنديد عاتي فــــــــــــحل
القربي كما صيد شد الجبل * اذا صهل * لعراف تستعرضوا بالســــلام
محل شاهد
ياسامعين القول هلّي حكيته – هذا اوّلو و اخرو ميزان
نحكيلكم عالساس كيف بنيته – ماتنجمه الا بوسع البال
أصل القول منضوم اني قريته – راهي الكلمة ما حدهاشي مال
ثمّة كلام كيما التبر في انيته – مثل الذهب مطبوع بالمثقال
ثمّة كلام كما الحنتيته – اللي يتصنطه ينزاد ليه هبال
ثمّه اولاد تفزع من اول عيطة – تقول صيودة شادة لجبال
و ثمه اولاد عليهم تخرخيطة – تقول ضبوعة مكتفة بحبال
ما تترماش على الناس كيغ صميطة – و ماتشريش لعركة بغير رجال
طول النهار تكرظ الكريطة – يطيح الليل و تكالو البغال
من الحكايات الشعبية التونسية :
“للأنثى مثل حظّ الذّكر ما داما يتقاسمان الجهد نفسه”. من الحكايات الشّعبيّة التّونسيّة على لسان الجدّة ما يوحي بطموح تريده المرأة التّونسيّة منذ القدم، مثل الأرنب والذّيب :
الأرنَبْ وَالذِّيبْ تْفَاهْمُو بَاشْ يَحْرثُو الأَرْضْ شِرْكه، تَمْ الأمْرْ، حَرْثُو وَبَعْدهَا حَصْدُو ودِرْسُو حَتَّى لِينْ جَاء وَقت الـقسْمَة بَاشْ يَـقـسمُو الـقمْح وَالشّعِيرْ.
بدَا الذِّيب يَـقسِمْ، ايكَيِّلْ وَيْـقولْ: «حصّتِينْ للذِّيبْ وَحصَّة للأرْنَبْ، تَاكلْ وَلاَّ عَجَلْهَا لاَ كلِتْ. ايكَيِّلْ وَيْقُولْ: «حصّتِينْ للذِّيبْ وَحصَّة للأرْنَبْ، تَاكلْ وَلاَّ عَجَلْهَا لاَ كلِتْ”.
الأرنبْ فهْمتْ للذِّيب بَاشْ يَاكللْهَا حَـقهَا. قالِتْلَه: “أنْتَ شْبِيكْ مزْرُوبْ، خَلِّي الأمْر يسْترَاحْ، أنَا مَا عنْدِيشْ حَتَّى عَلاَشْ انهزّْ بَاي، اسْتَنَّانِي اشْوَي نَعْمِلْ دُورَه وَنَرْجَعْلِكْ”.
مشتْ الأرْنَبْ وَرَجْعتْ بَعد اشْوَيْ وَمَعَاهَا سُلوﭬقي وَغَطَّاتَه بـقفَّة وَخَلِّتْ كَانْ وَذَانَه ظَاهْرِين، وَتلَفْتتْ للذِّيبْ وقالتْلَه: “أَيّْ بَرّ نـَقسْمُوا تَوْ”. هَزّ الذِّيب رَاسَه، شَافْ أوذَانْ السّْلُوقـي وَاقفِين، بدَا يَـقسِمْ وَايكَيِّلْ وَيـقولْ: “حصتين للّرنب وحصّة للذّيب ياكل وإلاّ اعجله لا كلا، حصّتِينْ للَّرْنَبْ وَحصَّة للذِّيبْ يَاكلْ وَإلاَّ اعجلَهْ لاَ كَلاَ، أُوذاَنْ الحـق بَانُو”. (راجع: قراءات أنثروبولوجيّة، جلال الرّبعي) مارأي امرأة اليوم في ما قالته جدّتي/ جدّتك/ جدّتنا؟
من الحكايات الشعبية التونسية :
حكيو علي واحد جنّان يخدم في الجنينه متاع السلطان، نهار ( الحال شتاء) يلقي شجره متع خوخ فيها خوخه، غله من غير وقت، في كبر كعبة البرقدان سبحان الخلاّق فيما يخلق..
السلطان يدولش في الجنينه و يتفرج، مشي لو يجري قالو: يا سيدي ايجي شوف ها الخلقه، مشي معاه السلطان تفرج في ها الخوخه العجيبه، قالو: رد بالك عليها، وكيف تطيب قصها و جيبهالي ( هي مزالت خضراء تحبلها كيف مانقولو جمعه باشتطيب) ، سي الجنان مشي يجري جاب حصيره ، فرشها تحت الشجره و قعد ثميكه يعس.
ليل مع نهار و هو ثميكه شادد العسه، و عينو ما تتنحاش من هاك كعبة الخوخ (لا معبود الا الله ) حتي عشاه و فطورو يجيبوهم لو لثميكه.
علاش موش نهار يجي نسر يحط علي هاك الشجره، و يكسر الأفراع متاعها و يفسد كعبة الخوخ.
مشي الجنان يجري للسلطان، يا سيدي راهو ها ماصار و ها ماصار
قام معاه السلطان مشي للجنينه شاف الشجره كيفاش مكسره، قالو : يلقي عملو. قعدالجنان حاير في أمرو، اشنوه نسر يجي يكسر شجره ، يلقي عملو. ياخي هو بنادم باش يلقي عملو ….؟
قعد يضحك علي السلطان : الله الله. نسر يلقي عملو، و هذا سلطان سلاطين آخرالزمان..
اياتعدات مده و هو باقي يخدم في هاك الجنينه، نهار يسمع في حس و تصرفيق جا يجري، يلقي هاك النسر فوق شجره، و حنش كبير اكحل متمكن بيه يبلع فيه ( والآخر يصرفق في جوانحو و يفركس باش يمنع) و الآخر يبلع فيه بالشويه بالشويه، حتي زرطو الكل و تسرسب هاك الحنش مع الشجره حتي للقاعه و مشي
تعجب هاك الجنان، و مشي يجري للسلطان حكي لو بالقصه …. قالو يا سيدي الحنش بلع النسر و كلاه
قالو : يلقي عملو
اشنوهها الكمنطرو هذايا، نسر يلقي عملو؟ حنش يلقي عملو؟ ياخي شنية صنعتو الحنش ؟ما هو يبدا يصطاد. فين يلقي هايشه الي يقدر عليها يترمي عليها و يبلعهاياخي حتي في هذي يلقي عملو ؟
زاد السلطان نقص في نظرو..
ايا تعدات أيام، مشات النازله من بالو، نهار هو يخدم شادد المسحه و يعزق وضربه من الضربات تجي في اللحم … جا يشوف يلقي نفسو : هاك الضربه جات في الغار متاع الحنش ، و الحنش تقص راسو.. راس حنش من هاك القادرين، بشعرو ،يفجع..
رماه في مخله و مشي اداه للسلطان. قالو: اشكون قتلو هذايه؟
قالو : يا سيدي هذا هو الي كلا النسر، أنا نخدم و ضربتو بالمسحه قصيتلو راسو ، قالو: تلقي عملك
اشنيه؟ توي و ليت أنا ماش نلقي عملي؟ علي حنش قتلتو؟ حنش الي هو عدو بنادم؟ اياالسلطان خرف مرّة وحده الله الله. بلاد يحكم فيها سلطان فالت، لا لامشات أمورنا مليح..
قعد أيام و فين يتفكر كلام السلطان يقوم يضحك، بعد مده مشات النازله من بالو
علاش موش نهار مَرْت السلطان ماش تجي تتفسح في الجنينه هي و بناتها ، جا باش حامبه نبه علي باش جنان ، خرج الجنانه الكل
هاك الجنان يخدم في بقعه مدغوره، ما سمعش و ما فطن بحتي شي و نساوه
هو يخدم ، و يسمع في نساء تتكلم، و لعب و ضحك و جري ،عرف الي الحريم جا ، وين ماش يمشي و ين ماش يتخبي وين ماش يهرب، بحذاه شجره عاليه تشعبط فيها وطلع تخبي في أغصانها
سعدك و المسعودين هاك الشجره جات تحت الجابيه قد قد..
و الجماعة قاصدين الجابيه..
دوب ما وصلولها قالو نعُوموا ، ما كانوش من العاكسين طاحوا ينحيو في حوايجهم الي تنزع تنقز تجي في الماء
وعوم و تشلبيق وبخّان بالماء و عياط و صياح ، ياخي واحده منهم شافت خيال فيالماء هزت راسها تشوف في سيد العين في الشجره يتفرج و ريقتو سايله ، مافاتو شي كانو في الصف الأول في التياترو..
قامت الصيحه، جاو لعساكر يجريوا، اش ثمة ياِ لله ؟ لا باس ؟ قالت لهم :شوفو هاك الكلب بن الكلب الي مخبي في الشجره يتفرج فينا
هبطوه، عطاوه طريحة نباش القبور، و هزوه (وينو مشطك يا عروس) رماوه في الحبس
هاوكه في الليل السلطان حكاتلو مرتو ، علي الصباح مشي للمحكمه ، الحكم الأول قال : هزوا هاك الجنان اشنقوه
مشات الطامه و العامه، لبسوه القشابيه عملولو ما يلزم للعرايس (للمشانيق) هزوه للمشنقه
ماوا العاده الي ماش يقتلوه يشهيوه، قالولو : تشتهي حاجه ؟ قال نحب توقفوني قدام السلطان نقولو كلمه و حده
اداووه للسلطان و قف قدامو قالو : يا سيدي، حكمت علي بالمشنقه ؟ قالو : ايه ، قالو : تلقي عملك.
اشنيه.. اشنوه ها الكلام ؟
قالو : النسر كسر الخوخه قلت يلقي عملو ، كلاه الحنش ، قلت يلقي عملو ، قتلت انا الحنش قلت لي : تلقي عملك ، توه حكمت علي بالموت ، تلقي عملك..
قال : سيبوه ، أيا اذهب من قدامي
كان عجبتكم الحكاية حط جام في خاطر الباج.
من الأمثال الشعبية التونسية :
اللى راح من العمر راح
ومحال ترجع ايامه
واللى طاح من العين طاح
ماعاد يعلى مقامه
اللى حبك حبة ماتفرطش فية
واللى يبيعكة بيعة
ناس بكرى قالوا
طول العشرة
تعرفك الدهب من القشرة
اذا بنيت غرق الساس
وارم الحجر شغل قوة
واذا عرفت اعرف اخيار
الناس اهل الفضل والمروة
الشيبْ والعيبْ
الصحبة صحبة والنية ما فمّاشْ
الماء الماشي للسّدرة الزيتونة أولى به
الصوف يتباعّ بالرزانة
الطمّاعْ يـْـباتْ سـَاري= الطمعْ و قـَطـْعان الرَّقبة متـْحاذيينْ
الطـّول والخسارة كـِي سلـّـومْ النصارَى
العزوزة هاززْها الوادْ وهي تقولْ العامْ صابة
الـغـيرة تـِذْهـِب الشيرة
المجراب تهمزه مرافقه
الزّلـقـة بـفـلـقـة
الله لا تقطعنا عادة
الله لا يجعلنا جـُرّة
الله لا يشمّتْ فينا أعداء
الله لا يحضرنا محاضر سوء
الله لا يرخصلـْنا فـْريسة “أيْ الجسد”
البغل تبدّلْ والكـَرّيطة هي هي
الـمْرَا تــُـولــِدْ راجلْ و رويجلْ و قطعة منيجلْ و عـْمارة على الخلاءْ
مايحس بيا غير اللى خالقنى
وماتبكى على غير اللى ولدتنى
ومن الاغنيات الشعبية التونسية ندعوكم للاستماع الى هذة الاغنية من التراث :
المصادر: بعض المواقع والمنتديات والصحف الأدبية وبعض الرواه .
اقرأ/ى أيضا :صفحات من الشعر الشعبى الليبى (ملف)
عذراً التعليقات مغلقة