أشعل وائل عبد العزيز شقيق النجمة ياسمين عبد العزيز مواقع السوشيال ميديا برسالة غريبة قام بنشرها عبر حسابه الرسمى على تطبيق”فيسبوك”,مما اثار جدلا بين متابعيه بعضهم ظن انه يعيش قصة حب جديدة, وفسر البعض الاخر انه يقوم بربط ما كتبه مع خلافاته مع شقيقته ياسمين بعد وقوعها فى حب الفنان احمد العوضى.
رسالة غريبة من شقيق ياسمين عبد العزيز من يقصد بها؟
وعلق وائل فى رسالته قائلا:”في ناس اتخلقت واتخلق ليهم الحب ودوّل نسبه قليله وقد تكون اندثرت في ظل كل مغريات الحياة.. وفي ناس تانيه “بتدور” علي الناس الي تحبها بالطريقة اللي هما يستهلوها .. الحب ده شيء مخيف !!”.
وتابع حديثه قائلا: “الحب بيوصل الناس للغيرة والشك وأغلب الوقت للقتل .. الناس بتفضل تدور على الحب عشان تعيش فيه للحظات قبل ما تنقلب العلاقة للأسوأ .. وهما الشوية دول بس، اللحظات الأولي في اَي علاقه الي بتفضل عايش عليهم ايّام كتيًر بعد انتهائها.. الإنسان يفضل يحب بكل ما يملك اللي قدّامه عشان يجي في يوم ويخونه أو يزهق منه أو ينجذب لشخص آخر أو العلاقة نفسها توصل لفقدان الإحساس اللي بيقود للملل”.
وأضاف: “الحب فعلا شيء مخيف صعب فهمه ولو كان سهل كانو ال ٧ مليار بني آدم على وجه الأرض زمانهم مرتاحين .. نهاية اَي علاقة ما بين شخصين هي مأساة هيعشها أربع أشخاص لان كل شخص هيدور ينسى اللي معاه بشخص آخر.. وهنا أصبح المجتمع مرضي نفسيين من تعدد العلاقات والكل مازال بيدور على شيء مخيف سبب في دمار معظم البشرية اسمه “الحب”.
واردف ايضا قائلا: “تفتكر ليه الناس بتحب تعيش الإحساس ده علي الرغم أنه وقته قصير جدا والوقت الأغلب أحاسيس أخرى بتفرض نفسها على العلاقة زاي الخوف والقلق والشك والغيره عدم الثقه وغيره وغيره كتيًر …!!؟ طيب هل الحياه بدونه اجمل !! هل لو عيشت حياتك بتحب حاجات تانبه زاي شغلك رياضاتك او الفلوس مثلا ويبقي ده الهدف من الحياة .. هل ده احسن !!.. أظن بردو لا لان هيجي اليوم الي قلبك يدوق وساعتها هتبقي بردو بدايه النهايه زاي كل القصص والمسلسلات والأفلام الي في العالم كله” .
وانهى حديثه قائلا :”شيء صعب مجرد التفكير بالشكل ده .. بس للاسف هي دي الحقيقه وزاي ما يكون الحب وكل أحاسيسه هديه من ربنا للبشرية وبيحاربه فيها شيطان رچيم ليفتك بالإنسانية .. يا تري الدور على مين”.
يذكر ان, شقيق ياسمين عبد العزيز قد شن هجوما عارما مؤخرا على تصرفات شقيقته مع الفنان احمد العوضى وسر علاقتهما وقال لها عبر حسابه على تطبيق “فيسبوك”:”بصي يا ياسمين يا عبدالعزيز يا أختي.. أنا معاكي وفي ضهرك من وانتي صغيرة، شيلت مشاكل كتير بسببك، من وانتي عيلة صغيرة، بداية من مشاكلك مع الشاعر، وبرادة وانتي عارفة، إن أنا اتأذيت فيها إزاي، وقضية الشغالات مؤخرًا، غير قضية الضرب اللي كانت بينك وبين بنت هشام سليم الممثلة اللي لبستيها التورتة في وشها”.
وأضاف: “وقفت جنبك بكل ما أملك من قوة أدافع عنك في كل موقف صعب مر عليكي، ونسيت حياتي ونفسي عشانك وبقى كل همي أنا ووالدتك إنك تكبري وتبقي نجمة في مجالك، سيبنالك اختياراتك كلها لنفسك، ووافقنالك على معظم قراراتك، وكنت الوحيد اللي ساندتك، ووقفت جنبك في طلاقك”.
واستكمل: “لكن هنهرتل وتروحي تعرفي واحد أصغر منك بـ10 سنين، وتتصوري صور مالهاش أي لزمة على حساب سمعتك وسمعتنا، لا ومحدش هيسمح، من إمتى وإحنا بنعمل أعياد ميلاد، وتنزل على السوشيال ميديا.. من إمتى الناس بتجيب في سيرتنا؟ ونقعد نتعاكس على السوشيال ميديا، ومع ذلك حياتك وانتي حرة فيها”.
وأوضح: “أنا هتكلم على الشق اللي يخصني.. انتي مقاطعة كل العيلة عشان تعملي اللي على مزاجك.. إحنا دلوقتي عايزين نفهم العلاقة دي إيه ورايحة على فين.. أما بالنسبة للأخ اللي ماشي وراكي في كل حتة، وشايفك البيضة الدهب اللي هتفقسله كل يوم، أحب أقولك يا راجل لما تيجي تدخل بيت، تدخله من بابه يا راجل! وتقعد مع رجاله البيت!.. دي الأصول وده الاحترام”.
واختتم: “طبعا لأنك عارف إنك مرفوض رفضا باتا، فعمرك ما هتعمل ده، ومعندكش غير طريق الشمال، اللي أنت سالكه من سنين مع بنات الناس.. أنا من رأيي كفاية عليك البطولة اللي أخدتها، والعربية المرسيدس الهدية.. وتركز في شغلك وتسيبنا في حالنا، لأن طول عمرنا في حالنا، ومحدش سامع عننا حاجة، وملوش لازمة جو الصور والمعاكسات ده، وأنا مبخفش من تهديد حد”.
ليفاجئه احمد العوضى برد فعله على رسالة شقيق ياسمين وهجومه عليه, وذلك بعد اعلانهما الارتباط وقال:”انهى بيت اللى ادخله من بابه.. ان كانت هي اللى بتصرف عليه وعلى ابنك اللي مخبيه وراميه وهي بتدفعله مصاريف مدرسته.. باب ايه يا ابنى ادخله هو انا شفت راجل واقف جنبها.. دي واحدة انت مبتعملش حاجة غير أنك بتستنزفها هي ومامتها.. باب ايه يا ابنى الى هدخله من بابه واكلم واحد بيتكلم على عرضه ولحمه قدام الناس.. يا ابنى انا من عين شمس منطقية شعبية اتربيت على ان الأخت والام والست الكلام عليهم من الكبائر.. عربية ايه يا ابنى انا اجرى الحمد لله يعيشني كويس ويجيبلي عربية حلوة وبيت كويس.. بمجهودي وشغلي مش على عرق واحدة ست.. باب ايه يا حبيبي اللي ادخله وانت أصلا عايش باسمها.. انا شقيت على حالي بعرقي.. لكن انت فشلت في كل شيء فشلت كممثل وفشلت كأب وفشلت كأخ وفشلت كبنى ادم”.
ورد وائل عبد العزيز على اتهامات أحمد العوضي برسالة اخرى عبر حسابه الرسمى على تطبيق “فيس بوك”، قائلا: “ردّك متوقع جدا لان هو ده أسلوبك ومش هيتغير بس انا هرد عليك..
بالنسبه ان احد بيصرف علّيا عمرها ما اديتني جنيه في جيبي وأحب افكرك اني قاعد في بيت ايجار وراكب عربيه تويتا كنت جايبها قسط من شقايا واظن انت شوفتها ايّام مسلسل لاخر نفس لما كان معاك عربيه لانسر .. ويادوبك حوشت عشان اغير عربيتي قريب ..وحتي لو حد من اهلي ساعدني في وقت ضيقه انت مالك !! .. والا معندكش كلام تقوله !!!؟
اما الشغل الي انا فاشل فيه فا لو بتعتبر ١٧ جايزه اخدتهم في اربع سنين فشل فا ياريت تعرف تبقي فاشل زاي لكنك مش هتعرف للاسف ..ومش انت الي تحدد فشلي ونجاحي في اَي شيء لانك طالع علي رقبه الناس “
وتابع: “اما اختي فالمواقف والسنين الي فاتت هيا الي هتبين انا عملت عشانها ايه .. وكلمه اني طالع علي حسها كل الناس عارفه اني شقيت طريقي لوحدي من ١٥ سنه وعلي الرغم من ده فا انا عادي ابطل تمثيل من بكره قدام مصالح اختي.
“اخيرا بقي .. ردّك ده علّيا اثبتلي انك ولا همك الانسانه الي انت ماشي تعاكسها في كل حته وعلي صفحات السوشيال وسيبت المهم وابتديت في تشويهي ومفكرتش تاخد خطوه محترمه تجاهها الا انك جريت علي الترند وهتشتغل شغل قذر لان ده الي يهمك “ترند” ” دور بطوله ” ” فلوس ” ” عربيات”.
“وبالنسبه للناس الي بتقول اني بتكلم علي موضوع ازي ده علي السوشيال ياريت تدخلوا تشوفوا صفحاتهم وتعرفوا ان الموضوع متعارف عليه للناس الا أهلها ..
ياسمين سالتني بعد الطلاق انها ممكن تحب وتتجوز وانا اول واحد قولتلها طبعًا حبيبتي ومن حقك وهبقي اول حد يفرحلك .. بس مش انت !! لاني اعرفك من سنين وعارف نواياك والأيام هتثبت صحه كلامي.
ونصيحه مني ليك لما تدخل علي ست متختارش وقت ضعفها وخروجها من طلاق ومشاكل لو فعلا بتفهم كنت بقيت صديق ينصح ويحافظ ويخاف لحد ما تبقي قويه تاني.. مش يتصور صور زاي دي يا محترم ..
واخيرا في ٥ اكونت باسمي علي فيس بوك وانستجرام معرفش عنهم حاجه .
وده اخر كلام عندي في الموضوع ده وهسيبه للأيام تكشف الحقائق”.
قد يهمك ايضا:
بصورة ساخرة ..محمد هنيدى يقارن بين شكله قبل وبعد الحظر
هنادى مهنى تتغزل بخطيبها احمد خالد صالح
رانيا يوسف تشارك متابعيها بهوايتها المفضلة .. فيديو
حفيدة هيفاء وهبى تخطف الانظار بتحدى الوسادة
