روبابيكيا
وجربت الهوى مره
وداب قلبي على الجمره
من النظره
وماكان الحنين مره
بيقصم ضهري بالمره
كلامه ،نبرته المُره
ساعت ماينوي عل الفرقه
على الغربه
بيوجعني
يقول ماشي
ومش ماشي
ولا راجع
ولا نافع
نكملها سوا السكة
ولا هيوشوش الأصداف
ولا يغني على ربابه :
يقول عاشقك
بحبك موت
بحب عيونك الناعسه
ولا يبعتلي جوباته
ولا هيقلي مشتاقلى
ومن غير ك أنا تايه
ك عيل يبكي م الحرقه
وبيدور على أمه
دي أمي فين ؟
يحس ف قلبه بالوحشه
ولا هيقول ده محتاجني
كبرعم لسه بينبت على الشجره
وعاوز حبه حنيه
ومستني تيجي المطره
عشان يخضر يتفرع
ويوصلي
يغنيلي :
أنا عايش عشان خاطرك
وإنت الشمس والقمرا
وإنت الضل عز الحر
انت النسمه بعد العصر
من بلكونة بحريا
ولا هيقول ولا كلمه
من اللي فات
ويدبح قلبي بسكاته
وهيبعني
مع الروبابيكيا في السكه
وهينادي:
حليوة ياناس وأموره
عنيها جنينة مسحوره
وعودها ذي عود الفل
ومهما قلت من أوصاف
م بقدر اوصف الحلوه
ولا ضحكتها وخدودها
ولا لفتتها وسكوتها
ولا دمعتها وجنونها
ولا رقة مشاعرها
وطعم الوعد
لما طل ذي الضي
من عينها
تعال شوف
ودوق ياسيدي
حلاوتها
دي قالب شهد
وغزل بنات وعسليه
ونوجا ،توفي، كرمله
حلاوة شعر ،وبسيمة
وذي عرايس المولد
من السكر
بتتمخطر وفرحانه
عليها التل والترتر
وفوق راسها ورورد صابحة
ومشتاقة حصان برده من السكر
وفارس شهم
تعال شوف
دي أحلى حلاوة ف الدكان
حلاوة طبيعي رباني
ورَيداني بقالها زمان
وانا بستني ييجي العيد
واجيب نجمات واشَبَِكها
وأعمل عقد بينور وأشبُكها
ياريت كان أبوها صدقني
وميقلش :يا مجنون روح
نجوم مين يابني إستهدي
داإنت لسه فوق الأرض
نجوم ايه دي اللي هتجيبها
روح اتغطي ونم بدري
واحلم يابني على قدك
وعبي جيوبك الفاضية
من النجمات
وهات حتة من القمره
وابني فوق سطوحها البيت
وحط الكرسي من بنور
وهات كم غيمة واطويها
واعمل مرتبة مُلوكي
ونادمنى واناموافق
محدش يرفص النعمة
روح اتغطي ونم بدري
هيجي يوم هتغلي كل حاجة فيه
وترخص أجمل الإحلام
ولا هتساوي فيها قرش
روح اتغطي ونم بدري
روح اتغطى ونم بدري
شعر: نهى رجب
22\4\2019
اقرأ/ى أيضا:
بحث شوال الارز اللى اتبحتر مين هايلمه؟ “قصيدة بالعامية”
عذراً التعليقات مغلقة