بعلو الصوت .. قصيدة بالعامية المصرية

ربيع الروح بيضحكلي ف ضيا عينك
وشمس الغايب الآتي
بترقصلي واغنيلك
عبير الشوووووق
لوردة حبك النادي بيندهني
وانا حادي . . . وانا بادي
بدون الخوف مايطفيني
ورا التايهين يوديني
ولاقيني . . .
لروحك روحي مندوهه
وبقفل سكة التوهه
وبفتح جنة العاشقين
شمال . . . ويمين
ورُحنا . . .
فوق جراح روُحنا
أدوس ع الشوك
فيطرح قلبك المرمر
تيجان ياسمين
دا حلم سنين . .
وفجأه أصحا . . .
ألاقي عيونك السارحه
ف ليل الغربه تقتلني
وكلي حنين
لاانا ف حضنك
لامفرقاك . . .
فايتني لمين ؟!
وبتسول خبر عنك
كما المجانينن
يجيني قلبك المسكون
بعشق التوهه والترحال
يغنيني . . .
ف حضن الليل
مع الموال
وعين على ليل بتوجعني
ومُرالوحده يقتلني
بألف سؤال
واصبر روحي واتقوَّى
ببكره الجاي
وانا مااملكش غيرقلبي وإحساسي
وضاع اسمك
ف كراسي . . . وبين ناسي
ولا طيلاك . . .
ولا ناسياك . . .
وشايفه روحي
بتطبطب على روحي
تقول
يمكن يكون جاني
وانا الجاني
والاقيني فهواك وحدي
أكسّر صمتي جوايا
وأصرخ فيك بعلو الصووووووت
يارب تموت ! نجوى سالم

شعر : نجوى سالم _ مصر