ايام يابلدى فيك عشناها .. الى سوريا الحبيبة

الشاعر ع12 يناير 2020آخر تحديث :
ايام يابلدى فيك عشناها
ايام يابلدى فيك عشناها

ايام يابلدى

فيكى عشناها

ولامره واحدة

فى يوم نسيناها

ايام ياسوريا ياحبيبة القلب

عشناك جنة ونعيم

وردة ف وسط الدرب

عشناك بستان مزهر

ودقنا معنى الحب

شبينا بين نسيمك الصافى

وكبرنا بين ربيعك الدافى

ورضينا بيك ام وحبيبه

ورضينا بيك غندورة ونجيبة

ما احلاك وانت وردة فوق الاوطان

ما احلاك جامعة ومدرسة واحضان

ما احلاك فكر عالى وثقافة

وتاريخ مجيد ونشيد للشرف عنوان

فى المزرعة زرعنا

وخضرنا مزارعنا

ولايوم ياغالية تهونى

ولا ف يوم بعنا

ف المدرسة كتبنا

وفهمنا ف علومنا

وف عز افراحنا

حبك يدمعنا

ف الجامعة شبينا

وقرينا وحكينا

سوريا حبيبة القلب

على ارضها حبينا

وعشنا قصص الحب

احنا وحبايبنا

ودعينا ياما الرب

وكتبنا ف كتابنا

اسسنا بيت ع الشط

خلفنا ولد مع بنت

وفرحنا بيهم كتير

وقلنا بكرة يكبروا

ويضللوا فوقينا

وقلنا بكرة يكبروا

ويغنوا حوالينا

يملوا حياتنا ف غنا

ونعيش ف اراضينا

وتبقى الحياة ف وسطهم

بستان مع جنينه

وتحلى الحياة ف حبهم

ويفرحوا عنينا

وفجاة قمنا الصبح

مالقينا اولادنا

وفجأة قمنا الصبح

مالاقينا احبابنا

وفجأة كل البيوت

صبحت قبور وتابوت

كل المدارس اتهدمت

كل الكنايس اتردمت

والمستشفيات ظلمت

حتى الجوامع كمان

فوق بعضها اتكومت

بلدى اللى كانت مزرعة وبستان

صبحت بقدرة خسيس

واحد عميل وجبان

كومة تراب وضباب

وعشنا وسط الهباب

ف بلدنا ناس اغراب

ودخلوا ناس مش مننا

طردونا من بين عشنا

وعشان مايحموا اللئيم

هتكوا كمان عرضنا

وعشان مايحموا اللئيم

اصبح حلال دمنا

دكوها دك بمدافع

ولاحد قادر يدافع

حصدونا من ع الارض

وماخلوا فينا نافع

وقيامة قامت قبل موعدها

بكت عيون الاطفال

ف عز يوم عيدها

وقيامة قامت مين اللى قومها

واحد خسيس وجبان

هوه اللى سلمها

للروس معاها ايران

امحوا معالمها

والشعب ياوالداه

يصرخ ويدعى الله

انه يفرجها

منا اللى فر لبلاد الغرب

ومنا اللى راح للشرق

عشنا الحياة ف الكرب

وبقينا عالة ع الخلق

مهما احتوتنا البلاد

مايسيعنا غير دارنا

ولادقنا طعم الوداد

من يوم غادرنا

واقفين لا حول لنا

ودخلنا ف الهوه

ضاعت خلاص مننا

عاوزه البلد قوه

عاوزة البلد شجعان

يحموا حمى الاوطان

ويفجروا البركان

يقضوا على الطغيان

ويزلوا واحد جبان

ويشربوا ف دمه

ويدوقوه همه

ويخلصوا بتارهم

ويرجعوا اوتارهم

من اللى مررهم

عاوزة البلد نخوه

ومرجلة وهمة

يشلوا واحد خسيس

عايش كما الغمة

دك البلد واتزل

واتخفى تحت التل

وغيره يفر يكر

ياخد القرار ويجر

لازم نحررها

ونرد مقدارها

لازم نرجعها

ونداوى اوجاعها

لازم نهنيها

ونزل من باعها

دى بلدنا نهديها

اسودها وسباعها

يلا بنا نرجع

وبلاش تانى ندمع

عودتنا كده كلنا

لبيوتنا ولارضنا

تحرق كتير توجع

والقوة ف المجمع

تجمع هنا الابطال

تقضى على البطال

تجمع هنا تجمع

بقوة وشجاعة ونضال

الدنيا راح تسمع

الدنيا راح تسمع

شعر : محمد عبد القوى حسن

عضو اتحاد كتاب مصر

التعليقات

عذراً التعليقات مغلقة

اكتب ملاحظة صغيرة عن التعليقات المنشورة على موقعك (يمكنك إخفاء هذه الملاحظة من إعدادات التعليقات)
    الاخبار العاجلة