آخر جواب” قصيدة بالعامية المصرية”
جاي يااما في الميعاد
لاجل اراعي الكام قيراط
اللي حدانا.. مايبوروش
جاي مش ناسي الميعاد
مهما طال بينا البعاد
جوة دمي يسري وعدك..
…والليالي ماتمحيهوش
جاي واستنيني يااما
هنهي بالسلامة خدمة
والرديف راح نيجي لمة
كل واحد جاي لغيطه
…والصعاب ماتكدروش
هو دة آخر جواب ؟
هو دة آخر جواب
من ضنايا اللي فارقني
قبل ماافرح بيه عريس؟
هو دة آخر جواب
من ضنايا اللي واعدني
يروي أرضه.. مايجينيش؟
قالي بس ادعي لي أنهي
مين يقولي بس أنهي
كان عميل أو كان موسادي
يقطف العمر ف ولادي
يحرق القلب اللي محني
في الفراق.. مستني يفرح
يوم لُقا ابني اللي شادي
بالنشيد من يوم ميلادي:
لكِ حبي وفؤادي..
لكِ حبي وفؤادي
زى ماابنى وعدني يروي
أرضه من شهد السواقي
مش هيخلف وعده.
..دا ابني
دمه سال جوة الشراقى
لاجل تطرح ورد يحيي
ذكرى ترفع رايتي حرة
ترفع الوطن اللي باقي
شعر: زهرة يونس _ مصر
***
اقرأ/ى أيضا:ألف فضيحة جنسية .. الفاتيكان من الخصيان للشذوذ
اقرأ/ى أيضا:فضيحة جنسية لتريستان تومس زوج كلوى كارداشيان
اقرأ/ى أيضا:ستيف اروين “صائد التماسيح” وذكرى ميلادة على جوجل
اقرأ/ى أيضا:ماذا قالت جماعة «الإخوان» عن إعدام 9 شباب بمصر؟
اقرأ/ى أيضا: 135 فيلم بملتقى القاهرة للرسوم المتحركة اهمهم ” البرج”
عذراً التعليقات مغلقة